Dolnoserbski Thunderbird 2.0.0.23 instalěrowaś

Dolnoserbske archiwowe wersije instalěrowaś

Wót toś teje wersije Thunderbird 2.0.0.23 sem stojotej mimo rěcnego pakśika teke programowej archiwa za Windows (w formaśe zip) a Linux (w formaśe tar.gz) k dispoziciji. Toś tej wersiji wopśimujotej južo kompletny program Thunderbird w dolnoserbskej rěcy. Trjebaśo rěcny pakśik jano pótom, jolic sćo originalnu engelsku wersiju Thunderbird južo ześěgnuł a njocośo wobšyrny kompletny dolnoserbski archiw ześěgnuś. Teke te wužywarje, kótarež z Apple Macintosh abo drugim źěłowym systemom źěłaju, muse rěcny pakśik wužyś, dokulaž źěłowy system Mac OS njestoj mě k dispoziciji.

Rozpakowanje archiwa zip za Windows

Aby archiwowu dataju zip (na pś. thunderbird-2.0.0.23.dsb.win32.zip) pód Windowsom rozpakował, klikniśo jadnorje na ześěgnjonu dataju a wótpowědny program zwězany z kóńcowku zip se startujo. Wubjeŕśo celowy zarědnik abo pódajśo nowy zarědnik, źož se zrozpakowane dataje maju składowaś. Źiśo pótom do wubranego abo napóranego celowego zarědnika a startujśo dataju "thunderbird.exe". Za stawne wužyśe napórajśo programowy zwisk na Desktopje. Klikniśo za to z pšaweju myškoweju tastu na prozne městno na Desktopje a zjawijo se kontekstowy menij. Wubjeŕśo zapisk "Neu" a pótom "Verknüpfung". Klikniśo na "Verknüpfung" a zapódatne wokno "Verknüpfung erstellen" se zjawijo. Klikniśo tam na tłócašk "Durchsuchen" a pytajśo zarědnik, do kótaregož sćo zrozpakowane dataje składł. Klikniśo pótom na dataju "thunderbird.exe", pótom na tłócašk "Öffnen". Něnto kompletna sćažka stoj w smužce "Befehlszeile". Klikniśo na "Weiter" a dalšne wokno z mjenim "Programmbezeichnung wählen" se zjawijo. Zapódajśo tam mě za programowy zwisk, na pś. Thunderbird 2.0.0.23. a klikniśo na tłócašk "Fertigstellen". Wokno se zacynijo a wuglědajośo zwisk Thunderbird 2.0.0.23 ze symbolom Thunderbird na Desktopje. Wótněnta móžośo Thunderbird pśecej z Desktopa startowaś.

Rozpakowanje archiwa tar.bz2 za Linux

Pód Linuxom rozpakujośo archiwowu dataju tar.bz2 z konsole abo terminalnego wokna. Pušććo se do celowego zapisa z pśikazom cd <celowy zapis> a zapódajśo:

tar -xvjf thunderbird-2.0.0.23.dsb.linux-i686.tar.bz2

Glědajśo: Jolic archiw njeinstalěrujośo do zapisa "Home", ale do drugego zapisa, trjebaśo pšawa administratora! Móžośo za to z konsole abo terminala pśikaz su zapodaś. Musyśo pótom swójo administratorowe gronidło zapódaś. Alternatiwnje móžośo se pśi startowanju Linuxa ako root přizjawiś. Pušććo se pótom do zapisa, źož su něnto zrozpakowane dataje a startujśo program Thunderbird pśez kliknjenje na dataju "thunderbird" (bźez datajoweje kóńcowki!)

Dolnoserbski rěcny pakśik za Mozilla Thunderbird instalěrowaś

Nawjedowanje za instalaciju rěcnego pakśika namakaśo na toś tom boku.